
马尔巴大师教言集MARPA23རྩ་རླུང་དྲ་མིག་འཁོར་ལོ།
2-1-69b
༄༅། །རྩ་རླུང་དྲ་མིག་འཁོར་ལོ།
༄། །རྒྱ་གར་སྐད་དུ། ནཱ་ཌི་བྲྀ་ཏ་ཛཱ་ལ་ཙཀྲ། བོད་སྐད་དུ། རྩ་རླུང་དྲ་མིག་འཁོར་ལོ། རྡོ་རྗེ་སེམས་དཔའ་ལ་ཕྱག་འཚལ་ལོ། །བདེ་དྲོད་མེ་འབར་ཁམས་ཀྱི་དྭངས་མ་ཞུ། །དྷཱུ་ཏིའི་ལམ་སྦྱངས་འོད་གསལ་ནམ་མཁའ་ལྟ། །འཁོར་བར་འཁྲུལ་བཅད་ཐིག་ལེའི་ཆུ་ལུད་ཀྱིས། །བྱང་ཆུབ་མྱུ་གུ་རྡོ་རྗེ་འཆང་ལ་འདུད། །དབང་དང་དམ་
2-1-70a
ཚིག་ལྡན་པའི་རྣལ་འབྱོར་བ། །དབེན་པའི་གནས་སུ་བདེ་བའི་སྟན་ལ་འདུག །མགོན་པོས་མགོ་རྒྱན་ཡི་དམ་བསྒོམས་པ་ཡིས། །ལུས་ལ་རྩ་གསུམ་འཁོར་ལོ་བཞི་གནས་པའི། །དྷཱུ་ཏི་ལུས་ཀྱི་སྲོག་ཤིང་ཚུལ་དུ་གནས། །ཡར་སྣ་སྤྱི་བོའི་ཧཾ་ལ་རྣམ་པར་ལྟ། །མར་སྣའི་ཨ་ལས་གཡོ་བའི་རླུང་སྡིགས་པས། །ཨ་ལས་མེ་འབར་སྤྱི་བོ་ཧཾ་ཞུ་བས། །བདུད་རྩིའི་རྒྱུན་འབབ་གཏུམ་མོའི་གསོས་སུ་འགྱུར། །དེ་ལྟར་བསྒོམས་པའི་ཐུན་རྗེས་ལ། །སྐེ་གདན་མགོ་དང་རོ་སྟོད་རྐེད་པ་དང་། །བསྐོར་ཞིང་གཅུས་ལ་ཡན་ལག་སྤྲུག་པར་བྱ། །དེ་ཡིས་རྩ་རླུང་ཐིག་ལེའི་སྐྱོན་རྣམས་སེལ། །དེ་ལྟར་བསྒོམས་པས་དང་པོ་དྲོད་སྐྱེ་སྟེ། །རྩ་ཁ་དྲོས་ནས་[མགྲིན་པ་ཟེར། རྣམས་ཟེར་བ་དག] ཁམས་ཀྱི་དྭངས་མ་ཞུ། །ཉིན་མཚན་ངོ་མི་ཤེས་པའི་བདེ་བ་འབྱུང་། །གསུམ་པོ་དབང་བསྐུར་མཚན་ལྡན་ཕྱག་རྒྱ་བསྟེན། །ཕྱག་རྒྱ་དེ་དང་ལྡན་པ་ལྔ་ལྡན་གྱིས། །དལ་བུས་སྲུབ་ཅིང་དོན་གྱི་ནམ་མཁའ་ལྟ། །མཁས་པ་ལྔའི་སྒོ་ནས་ཉམས་སུ་བླང་། །དེ་ཡི་ཉོན་མོངས་ཡེ་ཤེས་ལྷན་སྐྱེས་ཡིན། །འོག་རླུང་གྱེན་དུ་གཟུང་དབང་གྱེན་ལ་བལྟ། །རྐང་པ་ཐར་རྙོང་རྒན་པོ་བརྩོན་དུ་བཟུང་། །རྒྱ་མཚོ་རིར་སྦྱར་རིག་འཛིན་གྱེན་དུ་བཟློག །རིག་པ་མཐའ་ལྟད་གནས་ལུགས་དོན་ལ་བལྟ། །དེ་ལྟར་གནད་
2-1-70b
ལྡན་ཧཱུྃ་རིངས་ཧཱུཾ་ཐུང་གིས། །འཁོར་ལོ་བཞིའི་གནས་སུ་དྲངས་པ་ཡིས། །དགའ་བ་བཞིའི་ཡེ་ཤེས་སྐྱེ་བར་འགྱུར། །གཅན་གཟན་ཧུག་གིས་སྣོམས་དང་ཝའི་བཞད། །སྟག་མོའི་སྐྱུགས་དང་ཧག་དང་སེང་གེའི་སྤྲུགས། །སྦྱོར་བ་དེ་ཡིས་ལུས་ལ་ཁྱབ་པར་ཁྲེམས། །མགོ་བོའི་ལན་གསུམ་སྒྲིལ་ཞིང་རོ་སྟོད་གཅུའ། །རྐེད་པ་ལན་གསུམ་བསྐོར་ཞིང་རོ་སྨད་ས་ལ་གདབ། །རྐང་ལག་ལན་གསུམ་སྤྲུགས་པས་ཐིག་ལེ་ཡི། །ནད་མི་འཇུག་པས་མན་ངག་སེམས་ལ་ཆོངས། །དེ་རྗེས་སེམས་ཉིད་མ་བཅོས་པ་རུ་ཞོག །ཉིན་མོ་སྟེང་སྒོ་སྦྱང་ཞིང་ནུབ་མོ་འོག་སྒོ་སྦྱང་། །སྟེང་འོག་རྩ་རླུང་དྲ་མིག་འབྲེལ་བ་ལས། །སྐྱོན་སེལ་ཐབས་ཀྱི་འཁོར་ལོ་བསྐོར་བའོ། །འདི་ལྟར་ཉམས་སུ་ལེན་པའི་རྣལ་འབྱོར་པས། །ཞག་བདུན་སྦྱོར་བས་མཁའ་སྤྱོད་ངེས་པར་འགྲུབ།། །།ཨྠྀི། བླ་མ་རྣམས་ལ་ཕྱག་འཚལ་ལོ། །བསྟན་པའི་ཆོས་གཞན་རྙེད་བླ་ཡིས། །འདི་ཡི་སྦྱོར་བ་རྙེད་པར་དཀའ། །སྦྱོར་བ་རྙེད་པའི་རྣལ་འབྱོར་པས། །དོན་གཉེར་འབྲས་བུ་དཀའ་མ་ཡིན། །ཉིན་རེ་བྲམ་ཟེ་གསོད་པ་དང་། །མཚམས་མེད་ལྔ་ནི་སྤྱོད་པ་དང་། །མི་དགེ་བཅུ་ལ་སྤྱོད་པ་ཡང་། །ལམ་འདིར་ཞུགས་ན་འགྲུབ་པར་འགྱུར། །ཇི་ལྟར་
2-1-71a
མེ་ཏོག་པད་མ་ནི། །འདམ་གྱི་ནང་ནས་མཛེས་པར་ལྟར། །དེ་བཞིན་འདབ་འདྲའི་ལུས་དག་ལས། །ཡེ་ཤེས་རང་དགར་སྐྱེ་བར་འགྱུར། །ལྷ་ཡི་རྣལ་འབྱོར་ལྡན་པའི་ལུས། །རྩ་ཡི་གནས་ལུགས་གོང་ལྟར་མིན། །ཨ་ཡི་རྣམ་པ་ཧཱུྃ་དུ་བསྒོམ། །གཡས་གཡོན་གཉིས་ནས་མར་སྣར་ཡང་། །ཧཱུཾ་ཆུང་རེ་རེ་བསྒོམ་པར་བྱ། །སྐྱིལ་ཀྲུང་མཉམ་བཞག་སྒལ་ཚིགས་བསྲངས། །བསུས་(གསུས་)པ་སྒལ་པའི་ཚིགས་ལ་སྦྱར། །སྟེང་རླུང་མནན་ཅིང་འོག་རླུང་ཐེན། །ཧིག་གི་སྦྱོར་བས་ཧཱུྃ་གསུམ་པོ། །གཅིག་ཏུ་དྲིལ་ལ་གྱེན་ལ་འཕང་། །སྦྱང་དགང་གདབ་དང་དབབ་པ་དང་། །སྦྱང་བའི་ཡི་གེ་ཕྱེད་-དང་-གཉིས། །ཉིན་མཚན་གང་རུང་གཅིག་གིས་འགྲུབ། །འཇོག་པའི་དུས་སུ་ཕབ་ལ་བཞག །འཆི་ལྟས་བྱུང་ནས་རྣལ་འབྱོར་པས། །མར་ལ་མི་དབབ་ཡར་ལ་འཕོ། །འགྲོ་བ་རྣམས་ནི་རང་དབང་མེད། །འདི་ཡིས་ལམ་གྱིས་འགགས་པར་འགྱུར། །ཉི་ཤུ་རྩ་གཅིག་དབུགས་དག་གིས། །འཆི་བ་ཞེས་བྱ་རྣམ་རྟོག་ཡིན། །མེ་ཏོག་ཆར་ཕབ་མཁའ་འགྲོས་བསྐོར། །གདུགས་དང་རྒྱལ་མཚན་བ་དན་བསུ། །མཁའ་སྤྱོད་གནས་སུ་འཁྲིད་པར་བྱེད། །དེ་ཕྱིར་གདམས་པ་འདི་དང་ཕྲད་དཀའ་བས། །འགྲོ་བ་ཐམས་ཅད་འདི་ཡི་སྣོད་གྱུར་ནས། །ཀུན་ཀྱང་རྡོ་རྗེ་འཛིན་པ་ཐོབ་པར་སྨོན།། །།


目录
རྩ་རླུང་དྲ་མིག་འཁོར་ལོ།